الفصل الثاني: ما لا يراه الآخرون كان هاجس من النوع الي ممكن تقعد معه ساعات وتحكي وما يخطر ببالك انه ممكن يكون عنده كل هالتفكير الي ما بخلص ويمكن لو سألته شو فيك يحكيلك مافي اشي وهو فعلا مش عارف شو فيه اصلا لانه تعود يخبي كثير من الأشياء حتى عن نفسه مش بس عن الناس. الغريب انه كان يحب يفهم الناس ويحلل تصرفاتهم ويعرف ليش فلان حكى هيك وليش الثاني تصرف بهاي الطريقة بس لما يوصل الموضوع لنفسه بتصير الأمور أعقد وبصير مش عارف اذا هو فعلًا مظلوم ولا هو الي فاهم الأمور بطريقة غلط. هاجس مش انسان كامل ولا كان بحاول يقنع حدا بهاد الاشي عنده عيوب بيعرفها منيح وفيه تصرفات بعملها وبرجع يندم عليها بس المشكلة انه مرات بعرف انه غلطان وبضل يدافع عن حاله لمجرد انه مش حاب يعترف انه غلط وهاي من الصفات الي يمكن ما بحب يشوفها بحاله. كان عنده مشكلة غريبة وهي انه بده الناس تكون واضحه معه وصريحه بس مش دايمًا بقدر يكون بنفس الوضوح معهم ويمكن مرات يتوقع من الناس يفهموا اشياء هو نفسه مش قادر يشرحها. وبالرغم من كل هاد كان يكره انه ينفهم غلط وكان ممكن يضل يفكر بموقف صار من فترة طويله ويتذكر تفاصيله ويحاول يلاقي تفسير لكل كلمة انحكت مع انه ممكن الطرف الثاني يكون نسي الموضوع من زمان. يمكن هاجس كان متعب مش لانه حياته صعبه بالضرورة لكن لانه كان يصعب على نفسه أشياء كثير وكان عنده قدرة عجيبة انه يحول أبسط موقف لموضوع يحتاج تفكير وتحليل وكأنه ما عنده اشي أهم يعمله. ومع كل هاد كان عنده طموح كبير وكان بده يثبت لنفسه قبل أي حدا انه قادر يوصل بس أحيانًا كان يضيع بين الي بده يعمله وبين الي لازم يعمله وبين خوفه من انه يختار غلط. ويمكن أكثر اشي كان يحتاجه هاجس انه يتعلم كيف يعيش بدون ما يحاسب نفسه على كل تفصيل وكيف يتقبل انه مش كل سؤال لازم يكون اله جواب ومش كل موقف لازم يضل عالق براسه. بس هل كان مستعد يواجه نفسه فعلًا ولا كان عاجبه يضل يدور بنفس الدائرة ويقنع حاله انه مجرد شخص يحاول يفهم الحياة؟