بقيت أتغير، مش علشان الزمن… علشان الناس اللي ورّتني وشوش مكنتش متوقع أشوفها. في الزمن ده، الطيب بيتقال عليه غبي، وبيتضحك عليه بسهولة، وغالبًا أكتر شخص بيتوجع من أقرب الناس ليه. بيعتقد إنه يقدر يغير اللي حواليه، يصلّحهم، ويخليهم أحسن… بس هيغير مين ولا مين؟ مرة ورا مرة هيتجرح، ومرة ورا مرة هيتخذل، لحد ما في الآخر هيتعب من المحاولة ويقفل على قلبه. مش لأنه بقى قاسي، لكن لأنه اكتشف إن الطيبة من غير حدود ممكن تخلّي صاحبها يدفع تمنها غالي. أما الفئة التانية، فدي ناس المصلحة عندهم أولًا، حتى لو كانت على حساب اللي حواليهم. مش بيثقوا في أي حد، ومش أي شخص عندهم يستحق لقب صديق. بيتوقعوا أي حاجة من أقرب الناس ليهم، لكن ده مش معناه إنهم يسيئوا الظن أو يعيشوا شاكين في الكل. الفكرة إنك تحط كل الاحتمالات في حسابك، من غير ما تظلم حد… تحب، وتثق، لكن بوعي. لأنك لما تكون عارف إن الخذلان احتمال، لو حصل مش هتكون الصدمة بنفس القسوة. يمكن عشان كده اتعلمت إن العشم لازم يكون بحدود، والثقة مش بتتدي مرة واحدة، والقلب مهما كان طيب… لازم يتعلم يحمي نفسه.