⁌ #غربة_الأقوى ⁌ #اللهجة_العامية ⁌ GOJOU SATURO غوجو ساتورو مو بس هاد الشخص اللي الكل بيركض لعندو لما بتعلق الأمور، هو بالحقيقة الزلمة اللي دفع ضريبة ⌈الكمال⌋ من راحتو ونفسيتو تخيل انك تكون الأقوى لدرجة انك صرت عايش بكوكب لحالك، الكل بيطلع عليك كأنك سلاح أو منقذ، بس ما حدا بيسترجي يشوف الإنسان اللي ورا ⌈اللانهاية⌋ غوجو خلق وهو شايل ميزان العالم كلو على كتافو، وهاد الحمل خلاه يلبس قناع الولدنة والغرور، بس كرمال ما ينهار تحت ضغط مسؤولية هو ما اختارها بالأصل أكتر شي بيقهر بشخصية غوجو هي ⌈الوحدة⌋ اللي بتجي مع القوة المطلقة لما يكون عندك • العيون الستة • اللي بتشوف كل شي، بصير صعب تندهش بشي أو تحس بالخطر متل باقي هالبشر، وهاد الشي خلق فجوة بينو وبين الكل، حتى أقرب الناس لقلبو وحتى اللحظة اللي خسر فيها رفيق عمرو ⌈غيتو⌋، كانت اللحظة اللي غوجو فهم فيها إنو قوتو اللي بتهز جبال ما قدرت تحمي أغلى رفيق عندو من حالو، ومن هون صار هدفو مو بس يمحّي اللعنات، بل إنو يربي جيل جديد يقدر يوقف جنبو، مو وراه كرمال ما يضل لحالو بهالقيمة. قتالات غوجو مو مجرد استعراض عضلات وطاقة، هي رسالة للعالم إنو أنا هون كرمال تحسوا بالأمان بس ورا كل حركة ⌈موف⌋ أو ⌈أرجواني⌋ ، في تعب إنسان مضطر يكون مثالي طول الوقت، لأنو غلطة وحدة منو بتعني نهاية الدني. غوجو هو البطل اللي بيضحك بوج الموت مو لأنو قلبو ميّت، بل لأنو لازم يضل الأمل الأخير للكل، حتى لو كان من جوا مكسور وبس بدو لحظة هدوء يغمض فيها عيونو بعيد عن ضجيج هالعالم ووسخو. هو الأسطورة اللي علمتنا إنو القوة الحقيقية مو بإنك تسيطر على اللي حواليك، بل بإنك تعطي فرصة للصغار ليكبروا ويصيروا أحسن منك. غوجو ساتورو هو ⌈اللانهاية⌋ بعالم كلو حدود والجمال بشخصيتو إنو رغم قوتو اللي بتشبه الكمال - او كلمة تدل على الإلحاد - لسا قلبو بيحن لذكريات بسيطة من ايام المدرسة #كاتب